Hér er fjallað um óvænta ferð landsliðsins til Bandaríkjanna 1964, viðkomu þeirra í Ed Sullivan Show og straumhvörfin 1975 þegar fyrstu bandarísku leikmennirnir mæta hingað til lands. Skyndilega verður körfuboltinn á allra vörum og á næstu árum komu Kanarnir í röðum.
Sannkallað NBA-æði greip um sig hjá þjóðinni í upphafi 10. áratugarins þegar Michael Jordan varð stærsti íþróttamaður heims. Um svipað leiti voru erlendir leikmenn leyfðir á ný hér heima og leikmenn á borð við Franc Booker, Rondey Robinson og John Rhodes urðu stórstjörnur innan sem utan vallar. Sumir þeirra skildu eftir sig arfleifð og áhrif innan sem utan vallar löngu eftir sína tíð.
Penni Peppas varð fyrsta bandaríska konan til að leika hér á landi þegar hún gekk til liðs við Breiðablik árið 1994. Öskubuskuævintýri fylgdi í kjölfarið. Jenny Boucek lék með Keflavík og Ísland kom við sögu þegar hún steig risaskref fyrir konur í þjálfun og tók að sér starf NBA-deildinni. Dani Rodriguez settist hér að og varð fyrsta konan af erlendum uppruna til að leika fyrir íslenska landsliðið. Caitlin Clark er orðin ein stærsta íþróttastjarna Bandaríkjanna og gæti varðað veginn fyrir kvennaleikinn upp í óþekktar hæðir.
Keyshawn Woods gekk til liðs við Tindastól eftir að hafa flakkað á milli liða í Evrópu. Hann var stór örlagavaldur í vegferð liðsins að fyrsta Íslandsmeistaratitlinum. Damon Johnson tók efstu deild með stormi við komuna til Keflavíkur, fékk síðar ríkisborgararétt og lék fyrir landsliðið en er komin aftur á heimaslóð þar sem hann heldur úti körfuboltaakademíu fyrir börn og unglinga. Prufa fyrir stórmynd Spike Lee kom við sögu þegar Brenton Birmingham hélt til Íslands að spila fyrir Njarðvík. Hér er hann enn rúmum aldarfjórðungi síðar.