Sa chlár seo, déanfar iniuchádh ar chuid luachmhar d’oidhreacht chultúrtha agus nádúrtha na hÉireann – na fálta sceach. Tá na fálta sceach níos tábhachtaí sa lá atá inniu ann agus mar a bhí riamh, agus iad ina líonraí nádúrtha don fhiadhúlra. Sa chlár seo, fiosróidh Aedín Ní Thiarnaigh ról na bhfálta sceach i ndúlra na hÉireann agus foghlaimeoidh sí faoi na bláthanna agus plandaí fiáine a bhfásann iontu.
Sa chlár seo tugtar aghaidh chun na spéire agus iniúchadh á dhéanamh ag Aedín Ní Thiarnaigh ar an ghnáthóg is airde in Éirinn - na sléibthe.
Sa chlár seo, tugtar aghaidh ar ghnáthóg a bhí fliúrseach tráth ach atá anois imithe in éag ar fud na tíre – an móinéar traidisiúnta. Téann Aedín Ní Thiarnaigh go pócaí iargúlta faoin tuath le teacht ar an ngnáthóg ársa seo agus ar na bláthanna fiáine a bhfásann ann; an Gliográn, an Nóinín, an Mhínscoth agus an Bainne bó Bleachtáin.
Sa chlár seo, dírítear ar cheann de na gnáthóga is cáiliúla in Éirinn i dtaobh na bplandaí eisceachtúla a bhfásann inti; an ghnáthóg aolchloiche. Fiosraíonn Aedín Ní Thiarnaigh faoi na plandaí is coitianta a fhásann sa ghnáthóg creagach uathúil seo agus foghlaimíonn sí faoi mar a théann na plandaí i ngleic leis an tírdhreach lom, sceirdiúil. Déantar iniúchadh ar an Magairlín Meidhreach, an Ruithéal Rí, an Sú Talún Fiáin agus an t-Aiteall.
Sa chlár seo tugann Aedín Ní Thiarnaigh aghaidh ar chuislí na hÉireann; na haibhneacha. Is cois abhann a fhásann cuid de na bláthanna fiáine is aitheanta atá againn; Cam an Ime, Trom, Léine Mhuire agus Grán Arcáin. Déanann Aedín iniúchadh ar an seanchas agus ar na cuimhní cinn a bhaineann leis na bláthanna coitianta seo agus foghlaimaíonn sí faoi na húsáidí éagsúla gur féidir a bhaint astu.
Sa chlár seo téann Aedín Ní Thiarnaigh sa tóir ar na bláthanna a fhásann ar thalamh garbh; paistí talún tréigthe ina mbíonn cead a gcinn ag na plandaí fiáine. Ar chuid de na bláthanna is aitheanta ann tá an tSeamair Dhearg, an Phraiseach Bhuí, Lus na gCnámh Briste agus an Buaflíon Balla.
Sa chlár seo, téann Aedín Ní Thiarnaigh sa tóir ar sheanfhothracha; reiligí agus áiteanna uaigneacha eile ina bhfuil cead a gcinn ag na bláthanna fiáine. I dteannta an Dr Amanda Browne, foghlaimíonn Aedín faoin gCluas Chaoin, bláth nimhneach, coitianta a bhfuil cleachtas cliste aige chun feithidí a mhealadh agus a bhfuil an iliomad ainmneacha suimiúla air sa Ghaeilge.
Sa chlár seo déanann Aedín Ní Thiarnaigh iniúchadh ar na bláthanna fiáine a fhásann ar thaobh an bhóthair agus cuirtear spotsholas ar cheann de na bláthanna is fliúrsí agus is conspóidí sa tír, an caisearbhán.
Sa chlár seo tarraingíonn láithreoir Aedín Ní Thiarnaigh a buataisí báistí uirthi agus tugann sí aghaidh ar an mbogach, talamh uisceach na hÉireann. Díríonn sí ar chuid de na bláthanna fiáine is suimiúla a fhásann i dtalamh fliuch agus foghlaimíonn sí faoi na húsáidí ar féidir a bhaint astu agus faoin seanchas a mbaineann leo.
