As eternas obras da praza por fin terminaron. O alcalde está emocionado coa que considera a grande obra do seu mandato pero Don Crisanto non tarda en lembrarlle a promesa que lle fixo no seu día: a praza debe levar o seu nome. Aínda por riba, Don Crisanto pensa supervisar punto por punto todos os preparativos de cara á inauguración, algo que non fará ningunha graza ao alcalde.
Mentres, o plan de Horacio para interceder a favor de Mandi complícase. Coa batalla campal en que se converteu a bendición de animais, desencadéase o enfado do bispo e o seu apresurado regreso a Santiago. Parece que o mozo non vai ter nada fácil a súa readmisión no seminario pois o bispo segue a ter serias dúbidas acerca das súas revolucionarias ideas.
Pero este non é o único problema de Mandi, xa que tras rescatar a ovella perdida de Elsa, a pastora de Louredo, esta quedou enmeigada do mozo e está disposta a conquistalo sen importarlle a súa condición de futuro sacerdote. Na súa cruzada amorosa, Elsa contará cun apoio inesperado que quizais non lle brinde os consellos máis adecuados.
