Aníta Rós Tómasdóttir og Smári Kristinsson eru kornung, en eiga von á sinni þriðju dóttur ári eftir að önnur dóttir þeirra fæddist andvana. Við fáum að heyra einstaka sögu þeirra og upplifa með þeim eina af stærstu stundum ævi þeirra, þegar dóttir þeirra kemur í heiminn.
Stjörnukokkurinn Sindri Guðbrandur Sigurðsson er búin að vinna nær öll verðlaun sem hægt er í matreiðsluheiminum á Íslandi, en markmið hans hefur frá upphafi ferilsins verið þátttaka í erfiðustu kokkakeppni heims, Bocuse d´Or í Frakklandi. Undirbúningurinn stendur yfir mánuðum saman og útheimtir endalausa þolinmæði, tíma, peninga, blóð, svita og tár.
Heimildarþættir þar sem fylgst er með fólki í aðdraganda stærstu stunda lífsins og áhorfendum hleypt með þegar þær eiga sér stað. Í þessari fjögurra þátta röð fáum við einstaka innsýn í fæðingu barns, brúðkaup, stærstu og erfiðustu kokkakeppni í heimi og fegurðarsamkeppni þar sem keppandinn er á fertugsaldri.
Móeiður Sif Skúladóttir hugsaði sig ekki tvisvar um þegar hún var beðin um að taka þátt í Ungfrú Ísland, þótt hún væri orðin 37 ára og þar með elsti keppandi frá upphafi. Við fylgjumst með Móeiði í aðdraganda keppninnar og fáum að vera baksviðs þegar 20 ungar konur keppa um titilinn Ungfrú Ísland.